Hvar liggur rót vandans?

Það sem ríkisstjórnin stendur frammi fyrir er afleiðing þess að grunnhugmyndafræði Sjálfstæðisflokksins gekk óáreitt í 18 ár. Frelsi einstaklingsins var algert, eftirlitsstofnanir fjársveltar og þar afleiðandi eftirlit ófullnægjandi, hinir efnameiri fengu tækifæri umfram almúgan og molarnir áttu að detta af borðum stórfyrirtækja til undirmáls fólks. Síðast en ekki síst, einkavæðing gróðans og ríkisvæðing skuldanna.

Þessi hugmyndafræði var ráðandi meðan hægri flokkar réðu hér ríkjum og það leiddi okkur í hrunið. Nú eru vinstri flokkarnir að reyna að hreinsa til og það er ærið, jafnvel óviðráðanlegt verkefni.

Sú hugmynd að AGS sé að leggja línurnar er sennilega nokkuð rétt þegar horft er til þess gríðarlega niðurskurðar sem er lagður á heilbrigðiskerfið og félagslega kerfið. Ég get ekki ímyndað mér það að niðurskurður í þessum hluta ríkisfjármálanna sé vinsæll hjá nokkrum manni með vinstri hugsjónir.

Persónulega þykja mér síðustu niðurskurðaráform ríkisstjórnarinnar í heilbrigðismálum ógeðfeldar í besta falli. Ég skora á flokkana að endurskoða þessi áform þegar búið er að gera lánaumhverfi millistéttarinnar aðeins viðráðanlegra. Ég vona innilega að þjóðin gleymi ekki þeirri staðreynd að Sjálfstæðisflokkurinn mun hér eftir sem hingað til eingöngu bera hag hinna efnameiri fyrir brjósti og allur fagurgali mætti auðveldlega kalla hræsni.

Fela sig á bak við AGS

Hægri-öfgaaflið Framsóknarflokkurinn.

Ég las fréttablaðið í morgun og þar er haft eftir Jóni Sigurðsyni iðnaðar og viðskiptaráðherra að atkvæðagreiðslan um breytingu á deiliskipulagi standist ekki að lögum. Og að hún standi þá í mesta lagi í þrjú ár. Það er greinilegt að maðurinn er ekkert alltof klár stjórnmálamaður því að með þessu var hann að segja. "Við munum reysa þetta álver hvort sem það er kosið um það eða ekki" Einnig má skilja það sem svo. " Þið getið sleppt því að kjósa í framtíðinni því að það verður ekkert farið að ykkar vilja." Feginn er ég, það er margt skemmtilegra en að fara á kjörstað. En að segja þetta svona berlega á opinberum vettvangi að það muni ekki vera farið að þessum vilja fólksins í landinu, því að vilji hafnfirðinga endurspeglar að hluta vilja landsmanna og það er skírt að fólk vill ekki stóriðju, er bein og skýr yfirlýsing þess efnis að Framsóknarflokkurinn er í raun öfgasinnaður hægriflokkur sem tekur ekkert mark á vilja íbúa/landsmanna ef það stríðir gegn persónulegum hagsmunum þeirra sem flokkurinn er að vernda!

Ábyrgð Hafnfirðinga!

Það er þung sú byrgði sem hafnfirðingar þurfa að bera þessa daganna. Þeir standa í þeim sporum að ákveða hvort framtíðarbyggingarlandi Hafnarfjarðar sé eitt í forneskjuiðnað eða nýtt til uppbyggingar á sínum annars mjög fallega bæ. Það vita það allir að álver Alcan mun ekki loka fyrr en eftir 25-30 ár í núverandi mynd og þegar sá tími kemur munu bæjaryfirvöld í Hafnarfirði grípa þetta land fegins hendi því að landnæði er farið að verða af skornum skammti nú þegar svo að framtíðin liggur undir þessu álveri. Og þá meina ég UNDIR álverinu.  Lóðin sem álverið er á verður miklu mikilvægari sem byggingaland en menn geta ímyndað sér í dag. Haldiði virkilega að hið alþjóðlega stórfyrirtæki Alcan sé ekki nokkurnveginn alveg nákvæmlega sama um heilsufar, atvinnuástand eða bæjarbrag einhvers "krummaskuðs" uppá Íslandi. Þeir hugsa um ódýrt rafmagn, sem þýðir aukna arðsemi, sem þýðir aukinn hagnaður, sem þýðir meiri velsæld fyrir hluthafa og eigendur. Hvað Rannveigu Rist finnst, kemur málinu bara ekkert við. Hún er starfsmaður fyrirtækisins og ef hún vinnur vinnuna sína ekki eftir vilja eigendanna, þá verður hún einfaldlega rekin. Hvort álverið er í hafnarfirði eða Hamburg skiptir þá engu máli. Og ef eftir 10 ára starfsemi í nýju risaverksmiðjunni kemur í ljós að hún er ekki að skila þeim arði sem ætlast er til. Þá er bara lokað.  En hvað erum við þá búin að gera. Virkja enn einu sinni í Þjórsá , bora í sundur Hellisheiði, Brennisteinsfjöll, og víðar á Reykjanesi. Og vegna þess að allir kappkosta að komast í þessa yndislegu Álvers-vinnu þá verður búið að gelda víðsýni, frumkvöðulshugsun og framtaksemi sem enn finnst meðal vor.

Kæru Hafnfirðingar. Ég vona okkar allra vegna að þið sjáið sóma ykkar í því að kjósa gegn þessari breytingu á deiliskipulagi svo að við öll getum andað léttar um komandi ár.

 

Ríkið með Geysi í gíslingu

ÉG HEF áður tjáð mig um ástandið á hverasvæðinu við Geysi í Haukadal. Svæðið er stórhættulegt yfirferðar, sóðalegt ásýndar og þjóðinni hreinlega til skammar. Niðurníðslan á hverasvæðinu hefur verið slík, að ég hef fundið mig knúinn til að biðja farþega mína afsökunar þegar ég á leið þar um!

Þegar ég hef verið á ferð á þessum slóðum hef ég einnig nöldrað yfir þessu ástandi við starfsbræður mína sem flestir eru mér sammála en nýlega hitti ég þar mann sem bjó yfir upplýsingum um málið. Hann tjáði mér það að styr stæði um eignarhald á svæðinu! Milli ríkisins, sem á hluta, og afkomenda Sigurðar Greipssonar, skólastjóra, sem eiga afganginn af landareigninni. Að ríkið hefði dregið lappirnar í málinu í mörg ár og því endurbætur ómögulegar. Ég þykist vita að staðarhaldarar vilji ganga í það verk að gera svæðið að þeirri ferðamannaperlu sem því ber, en samkvæmt þessum upplýsingum stendur ríkið í vegi fyrir því. Gæti það verið tilfellið að Ríkið stæði markvisst í vegi fyrir uppbyggingu svæðisins? Er viljaleysi ráðamanna til að klára málið algert og hafa stjórnmálamenn enn einu sinni orðið okkur þjóðinni til háborinnar skammar? Það kæmi mér persónulega lítið á óvart!

Ég hef það einnig fyrir satt að Orkuveitan hafi heimtað að ábúendur hættu að nýta afrennsli af hverasvæðinu til húshitunar en engar áætlanir hafi verið lagðar fram um hvernig eigi að koma annarri hitaveitu til þeirra í staðinn. Í allri þeirri umræðu um sjálfbæra nýtingu orkugjafa sem nýverið hefur gengið yfir ætti að gera svona nýtingu jarðvarma hátt undir höfði. Samkvæmt mínum takmörkuðu athugunum var það Sigurður Greipsson bóndi og skólastjóri að Geysi sem hóf nýtingu jarðvarmans fyrir einum 80 árum og var eingöngu notast við affall hvera sem eru neðarlega á hverasvæðinu.

Er það gróðahyggja Orkuveitunnar sem rekur þá til þess að reyna að drepa þessa sjálfbæru, náttúruvænu nýtingu á hveravatninu eða er það umhyggja fyrir því að ábúendur og gestir að Geysi fái örugglega heitt vatn sem stenst ISO staðal? Hvað haldið þið? Þetta kemur kannski flatt uppá lesendur en ef litið er á úrelta framtíðarsýn ráðamanna í landinu þá kemur þetta ekki svo mjög á óvart. Þeir virðast yfir höfuð hafa 50 ára gömul viðhorf til flestra hluta. Þeir líta enn á málin frá bæjardyrum í torfbæ bændasamfélagsins þar sem ferðaþjónusta var erlent fyrirbrigði sem þekktist ekki hér. Fyrir 57 árum voru það 4383 ferðamenn sem heimsóttu Ísland en árið 2005 voru þeir tæplega 375 þúsund. Ósnortin náttúra í dag er eilítið annað en fyrir 50 árum. Menn þurfa að gera viðeigandi ráðstafanir svo að staður geti þolað viðlíka átroðning og Geysir má þola. Fyrir 57 árum þoldi Geysissvæðið að allir þeir sem heimsóttu landið gengju þar um óhindrað en í dag verðum við að gera ráðstafanir til verndar náttúrunni. Náttúruleiki svæðisins er fólginn í að varna því að gestir svæðisins gangi í leirnum og útfellingunum. Svo er það okkar færu verkfræðinga að gera það þannig úr garði að fólk geti notið fegurðar svæðisins án þess að eyðileggja það. Það er brýnna en ráðamenn virðast vera færir um að skilja að ganga frá eignarhaldi Geysis svo að sú uppbygging sem þörf er á geti átt sér stað. Hverju má það sæta að málið sé ekki komið á rekspöl? Eðlilega er ekki hægt að gera mikið til uppbyggingar á svæði sem maður á ekki nema að hluta, og ekki er ríkið sá nágranni sem maður vill eiga samskipti við nema í algeru lágmarki. Það firnaþunga bákn. Geysisbændur hafa lýst yfir vilja til að selja ríkinu sinn hluta svæðisins innan girðingar. Þeir vilji ganga frá eignarhaldinu sem fyrst svo að hægt sé að byrja á einhverjum endurbótum á svæðinu. Þeir eiga tilfinningalegar rætur á þessum stað og vilja sjá þessu svæði vera sýnd meiri virðing en nú er. Þeir hafa verið að reyna að selja ríkinu sinn hluta síðan 1991 og finna má heimild til kaupa á svæðinu á fjárlögum allt aftur til ársins 2002 svo að ekki strandar það á leyfisveitingum. Ég get ekki trúað því að verðlagningin sé svo yfirgengileg að ekki sé hægt að ná lendingu í því máli. Einnig hafa Geysimenn prófað að óska eftir því að kaupa hlut ríkisins en allt kemur fyrir ekki. Það ber að athuga að um er að ræða gríðarlega möguleika á sviði ferðamála, fræðslu og ýmissa rannsókna á þessu svæði. Að ónefndum þeim gríðarlegu tekjum sem væg gjaldtaka inn á svæðið gæti skilað. Slík gjaldtaka, t.d. 100 kr á gest, gæti fyllilega staðið undir viðhaldi þeirra mannvirkja sem komið yrði upp.

Eins og sjá má hafa stjórnvöld og þeirra skriffinnar haldið þessum vinsælasta ferðamannastað okkar Íslendinga í gíslingu í fleiri ár og er fyrir löngu kominn tími til að menn fari að ganga í að klára þetta mál. Ég er þess fullviss að ráðherrar og þeir ráðuneytisstarfsmenn sem að málinu koma hafa örugglega nægilega há laun til að vinna vinnuna sína betur og með meiri sóma en þetta gefur til kynna! Þeir sem að málinu koma ættu því að hysja upp um sig buxurnar, drattast á lappir og klára þetta mál sem er okkur landsmönnum öllum til svo mikillar skammar.

Höfundur starfar í ferðaþjónustu.